UPPLIFÐU

Reynisfjara er einn af vinsælli ferðamannastöðum á landinu, enda gaman að koma þar. Svarta fjarann er einkenni suðurstrandarinnar á Íslandi, Reynisfjall teygir sig í sjó fram við Reynisfjöru. Það er að mestu byggt upp af Móbergi en með einstaka hraunlögum á milli.

​

Neðst við Reynisfjöru eru fallegar stuðlabergs myndanir og fallegur hellir. Fyrir utan ströndina má sjá Reynisdranga semru eru um 60 metra háir drangar sem standa upp úr sjónum. Ef horft er til vesturs blasir Dyrhólaey við og Dyrhólaós.

​

Reynisfjara er falleg eins og áður segir en getur líka verið varasöm, þar sem brimið þar getur verið hættulegt ef menn gæta sín ekki. Eins hefur hrunið úr klettunum fyrir ofan fjöruna. Þannig að aðgát skal höfð.

Einnig er gaman að virða fyrir sér fuglalífið á svæðinu yfir sumartímann.

Dyrhólaey er móbergsstapi í Mýrdal á suðurströnd Íslands. Hún dregur nafn sitt af því að gat hefur myndast á þessum um það bil 120 metra háa skaga sem sjórinn flæðir í gegnum. Klettatanginn sem skagar fram úr eynni og gatið er í gegnum nefnist Tóin. Dyrhólaey er einnig nefnd Portland af sjómönnum. Hún var lengi syðsti oddi fastalands Íslands en eftir Kötlugosið 1918 hefur Kötlutangi verið syðsti oddi landsins. Í eynni er mikil lundabyggð. Dyrhólaey var friðlýst árið 1978.

​

Undan Dyrhólaey eru allnokkrir drangar úti í sjónum. Þekktastur þeirra er Háidrangur, sem er þverhníptur og 56 metrar á hæð. Hann kleif Eldeyjar-Hjalti Jónsson fyrstur manna árið 1893 að beiðni bænda í Mýrdal og rak þá nagla í bergið og setti keðjur á nokkrum stöðum, svo að eftir það var hægt að nýta dranginn til fuglatekju. Aðrir drangar eru Lundadrangur, Mávadrangur, Kambur og Kvistdrangur.

​

Árið 1910 var byggður viti á eynni, hann var endurbyggður 1927. Upphaflega hafði vitavörðurinn fasta búsetu á staðnum. Dyrhólaey og drangarnir í nágrenni hennar er mikil paradís fuglaskoðara. 

Flugvélaflakið á Sólheimasandi hefur verið á sandinum frá því 1973. En það var þá sem vélinni var nauðlent í fjörunni eftir að hafa glímt við vélarbilun á leið sinni frá Höfn í Hornafirði til Keflavíkur. Vélin var síðan dregin upp á sandinn þar sem hún er í dag og tekið úr henni það sem hægt var að nota. Flugvélarflakið var síðan lítt þekkt og hrafninn sem átti laup í stjórnklefanum fékk að vera þar í friði og ró.

​

Það var síðan upp úr aldamótunum 2000 sem flakið varð vinsælla og hefur á síðustu árum orðið einn vinsælasti ferðamannastaðurinn á landinu. Það má að einhverju leiti rekja til heimsókna kvikmyndastjarna og poppgoða eins og Justin Bieber sem bjó til myndband við lagið sitt I’ll Show You þar sem hann renndi sér á hjólabretti upp á flugvélaflakinu. Þá var myndband við lagið Gerua með Bollywood stjörnunum Shan Rukh Khan og Kajol tekið við flugvélaflakið.

Sólheimajökull er syðsti hluti Mýrdalsjökull og um leið syðsti skriðjökull landsins. Hann er um 13 kílómetra langur og á upptök sín úr öskju eldstöðvarinnar Kötlu sem er ein af stæðstu og virkustu eldstöðvakerfum á Íslandi. Jökulinn rennur bratt niður af öskjubarminum og niður þröngan dal, alla leið niður á láglendið.

​

Frá jöklinum rennur jökulsá á Sólheimasandi sem sökum brennisteins fýlu er oft kölluð Fúlilækur af heimamönnum.

​

Sólheimajökull hefur hopað mikið á síðustu tveim áratugum eða svo. Meðal hop jökulsins er um og yfir 50 metrar á ári og áætla má að hann sé að tapa um 10 til 15 metrum af þykkt fremst á jöklinum á sama tíma á hverju ári. Upp úr síðustu aldamótum byrjaði að myndast lón fyrir framan jökulinn og hefur það stækkað mikið á undanförnum árum á sama tíma og jökulsprðurinn hefur lækkað mikið. 

​

Umhverfi jökulsins er fagurt og gaman að ganga að jöklinum. Hann er frábær staður fyrir þá sem vilja kynna sér hop jökla og þá landmótun sem skriðjöklar hafa haft á landslag á Íslandi í gegnum árþúsundin. 

​

Eins og áður segir þá er jökulinn hluti af Mýrdalsjökli sem hylur öskju eldstöðvarinnar Kötlu. En Katla hefur hlaupið fram Sólheima- og Skógasand og mótað svörtu sandana þar. Síðast kom lítið jökulhlaup frá Kötlu niður undan Sólheimajökli árið 1999. 

Skógafoss er af mörgum talinn einn af fegurstu fossum landsins og þótt víðar væri leitað. Hann fellur af fornum sjávarhömrum vestan Skóga, úr Skógá sem á upptök sín annars vegar undan Eyjafjallajökli fyrir neðan Fimmvörðuháls og hins vegar vestasta hluta Mýrdalsjökuls. Báðar þessar kvíslar eru bergvatnsár en í miklum leysingum taka þær á sig mynd móbrúnna jökulvatna. Milli þessara kvísla heitir Landnorðurstungur, fremur hrjóstrugar beitilendur. Við Kambfjöll sameinast þessar kvíslar og úr verður ein á Skógá. Í ána renna einnig lindir og litlir lækir.

Eyjafjallajökull er fimmti stærsti jökull Íslands. Nafn hans bendir til að hann sjáist frá Vestmannaeyjum. Undir jöklinum er eldkeila sem gaus síðast 1821-1823. Eyjafjallajökull er einn af hæstu tindum Íslands, um 1.666 m hár. Úr jöklinum renna 2 skriðjöklar sem heita Steinsholtsjökull og Gígjökull en þeir skríða báðir til norðurs í Þórsmörk. Hafa þeir á síðustu árum hörfað mikið og er gígjökull nánast að hverfa.

Eyjafjallajökull og Mýrdalsjökull eru næst hvor öðrum á Fimmvörðuhálsi. Þar reka Ferðafélag Íslands og Útivist 2 gistiskála sem heita Baldvinsskáli og Fimmvörðuskáli. Eyjafjallajökull er mjög varasamur til ferðalaga vegna jökulsprungna en jökullinn er mjög brattur og sprunginn. Jarðhiti er undir honum sem bræðir hann neðan frá.

Foss í Seljalandsá þar sem hún steypist fram af hömrum Vestur-Eyjafjalla norðan við Seljaland.

Seljalandsfoss er á mörkum milli Seljalands og Hamragarða, einn af hæstu fossum landsins og horfir vel við á leið austur um Landeyjar. Gengt er á bak við fossinn. Mörgum þykir fossinn fegurstur í síðdegissól.

Gljúfrabúi, sem er um 40 metra hár, er í landi eyðijarðarinnar Hamragarða sem Skógræktarfélag Rangæinga fékk að gjöf árið 1962 og er nú í eigu Rangárþings eystra. Ákveðin dulúð er yfir fossinum þar sem hann fellur ofan í djúpa gjá en framan við fossinn er mikill hamraveggur úr móbergi sem lokar fossinn af svo aðeins sést rétt efst í hann. Kletturinn sem lokar fossinn af kallast Franskanef. Áður fyrr töldu menn að hann og hamrarnir í kring væru bústaðir huldufólks. Hægt er að klifra upp á Franskanef og sjá fossinn ofan frá. Á glæfralegustu stöðunum er keðja sem hægt er að styðja sig við, það þarf þó að sýna varfærni ef upp er farið og er það alls ekki fyrir alla. Einnig er hægt að fara úr skónum og vaða ána inn gilið og er það mögnuð upplifun. Hafa skal varann á þegar farið er inn gilið því hætta er á grjóthruni. Fyrir neðan Franskanef er gömul baðþró og inn af þrónni er lítill hellir sem heitir Ömpuhellir eftir einsetukonu sem þar á að hafa búið. Fyrir ofan Ömpuhelli eru tvær hvilftir inn í bergið sem nefnast Efra og Neðra ból. Í Neðra bóli var fyrr á tímum þurrkaður þvottur en í Efra bóli voru þurrkuð reipi og má enn sjá snaga í berginu í báðum þessum bólum. Gljúfrabúi er friðlýstur sem náttúruvætti.

​

Töluvert sunnan við Gljúfrabúa er lítið gil í hamraveggnum þar sem hægt er að fara upp á heiðina fyrir ofan og virða fyrir sér útsýnið yfir héraðið. Talað var um að fara upp Stíginn og lækurinn í gilinu nefndur Stígslækur. Stígurinn er enn nokkuð skýr, hálfgerðar tröppur eru upp þar sem er brattast. Rétt fyrir ofan brúnina eru leifar gamalla fjárhúsa frá Hamragörðum.

Vestmannaeyjar, eru ýmist taldar 15 eða 18, sæbrattar hamraeyjar með grónum hlíðum og rindum /grasgeirum og auk þeirra nærri 30 sker og drangar. Allar hafa eyjarnar orðið til í neðansjávareldgosum, þær elstu fyrir u.þ.b. 10.000 árum, hluti þeirra fyrir 5.000 árum og þá rann m.a. Ofanleitishraun úr Helgafelli.

​

Yngsta eyjan, Surtsey, reis úr hafi 1963, en Surtseyjargosið stóð í tæp 5 ár. Árið 1973 gaus í Heimaey, einu eyjunni sem er byggð, og komu þar upp 240 millj. rúmmetrar af hrauni sem að hluta fór yfir byggð Heimaeyjar, eða tæp 400 af 1.200 húsum sem þar voru. Fyrir 1973 bjuggu 5.300 manns í Eyjum en 2013 voru þar 4.135 íbúar.

​

Fuglalíf Vestmannaeyja er mjög fjölskrúðugt og hvergi við Ísland verpa eins margar tegundir sjávarfugla.

​

Vestmannaeyjar hafa lengstum verið stærsta verstöð Íslands. Í Vestmannaeyjum er mjög glæsilegt fiskasafn með flestum íslensku nytjafiskunum, steina- og fuglasafn og Náttúrufræðistofa Suðurlands. Byggðasafn er þar, listasafn og gott bókasafn. Golfvöllur, sundlaug, gönguferðir og skoðunarferðir á sjó, landi og úr lofti. Sérstæð er Sprangan í Skiphellum, þar sem börn og unglingar læra bjargsig. Á Skanssvæðinu er eftirlíking af stafkirkju frá 10. öld, þjóðargjöf Norðmanna til Íslendinga á 1000 ára afmæli kristnitöku árið 2000 í minningu þess að Ólafur Tryggvason gaf kirkju til Íslands þegar Hjalti Skeggjason og Gissur hvíti komu til landsins árið 1000 til að kristna Íslendinga. Skyldi kirkjan reist þar sem þeir kæmu fyrst að landi á leið sinni til Þingvalla. Á Skansinum hefur einnig verið endurbyggt annað elsta húsið í Eyjum; Landlyst. Var það upphaflega byggt sem fæðingarheimili árið 1847 þegar ginklofi var landlægur sjúkdómur í Eyjum og 60-80% nýbura dóu úr honum.

Þórsmörk er svæði norðan Eyjafjallajökuls og vestan Mýrdalsjökuls. Þórsmörk afmarkast af Mýrdalsjökli í austri, Krossá í suðri og Markarfljóti og Þröngá í norðri. Nafn sitt dregur Þórsmörk af germanska guðinum Þór en í Landnámabók segir að Ásbjörn Reyrketilsson hafi numið land í Þórsmörk og helgað landnám sitt Þór. Blaðmosar, burknar og birkitré vaxa þar og er gróðurfarið mjög fjölbreytt. Meginástæða gróðursældar í Þórsmörk er sú að svæðið er náttúrulega varið fyrir búfé af torfærum ám og jöklum. Bændur úr Fljótshlíð og undan Eyjafjöllum ráku fé á Þórsmörk til beitar bæði sumar og vetur og stunduðu þeir einnig skógarhögg á svæðinu. Voru skógar mjög illa farnir af beit á Þórsmörk og nærliggjandi afréttum í byrjun 20 aldar og í kjölfar Kötlugoss 1918 var Þórsmörk beitarfriðuð og falin Skógrækt ríkisins til umsjónar. Árið 1990 stækkaði beitarfriðlandið með samningum Landgræðslu ríkisins við vestur Eyfellinga en þeir höfðu rekið fé á Almenninga. Birkiskógar hafa sáð sér út yfir stór svæði í Þórsmörk við friðunaraðgerðir Skógræktar ríkisins og Landgræðslunnar.

Krossá rennur niður Krossárdal og skilur Þórsmörk frá Goðalandi í mörgum kvíslum.

Krossá er jökulá og er því mjög köld og breytir sér oft. Yfirferð getur verið hættuleg og hafa nokkur banaslys orðið í ánni. Brú hefur verið gerð fyrir fótgangendur.